As producións cuxo equipo técnico e/ou humano proceda doutro país total ou parcialmente, así como as empresas españolas que decidan rodar no estranxeiro, teñen que prever e organizar a súa actividade de acordo coa lexislación vixente de transportes e aduanas. De acordo con ela, non é necesario facer ningunha declaración nin pagar ningún tipo de taxa para transportar material entre os países da Unión Europea debido á abolición das fronteiras fiscais entre os estados membros.
Transporte de material
O transporte de material entre países non membros da UE réxese polas condicións do chamado Caderno ATA, un formulario expedido pola Cámara de Comercio e Industria (ou o seu equivalente) de cada país, que permite exportar material audiovisual de maneira temporal. Cada país determina a contía do aval ou cheque bancario que é obrigatorio deixar en concepto de depósito.
-
Países que esixen un depósito do 100% sobre o total do material: Alxeria, Botswana, Croacia, Estonia, India, Israel, Lesotho, Líbano, Lituania, Macedonia, Marrocos, Namibia, Rusia, Sudáfrica, Swazilandia, Tailandia, Túnez, Turquía e China.
-
Países que esixen un depósito do 50% do total do material: Australia, Bulgaria, Canadá, Corea do Sur, Costa de Marfil, Eslovaquia, Eslovenia, Estados Unidos, Xibraltar, Guadalupe, Hong Kong, Hungría, Islandia, Xapón, Malaisia, Malta, Martinica, Mauricio, Noruega, Nova Caledonia, Nova Zelandia, Polonia, República Checa, Romanía, Saint Pierre et Miquelon, Senegal, Singapur, Sri Lanka, Suíza, Tahití e Chipre.
-
Canarias e Andorra esixen un depósito do 25% do total do material salvo no caso de grupos musicais e teatrais. O resto de territorios non mencionados nas relacións anteriores non esixen ningún tipo de depósito, aínda que se recomenda poñerse en contacto co consulado correspondente co fin de concretar os trámites. A reimportación do material tense que facer durante o período de validez do Caderno ATA.
Transporte de animais
O transporte de animais entre países non comunitarios require un permiso previo do Ministerio de Agricultura. Se o transporte se produce entre países comunitarios, en cambio, o permiso outórgao o departamento de Medio Ambiente. Este permiso está suxeito a certas restricións, conforme ás cales todos os animais teñen que pasar un control veterinario. Se o médico o considera oportuno, incluso se lle pode someter a un período de corentena.
Transporte de material cinematográfico
O transporte de material cinematográfico impresionado ou revelado supón sempre un proceso de exportación. A película debe reenviarse ao país de orixe en réxime de reexportación simple incluso nos casos nos que se impresionara o revelado en España. Cando a película non se revelara en España, a lata deberá incluír unha nota en inglés coa lenda “Do Not Open” e “Do Not X-Ray” a fin de evitar danos na película por apertura ou exposición a raios X.
