SHOOTING AT THE END OF THE WORLD
Situada no noroeste de España e aberta ao Atlántico, Galicia é o finisterrae, a fin da Terra e un espazo de encontro cultural que leva máis de 2.000 anos recibindo viaxeiros, relatos e miradas. A súa historia, o seu simbolismo e a súa identidade constrúen un territorio cunha forte personalidade narrativa, recoñecible e singular.
Un lugar no que as paisaxes transitan do mar á montaña en poucos quilómetros, permitindo recrear as catro estacións do ano nun único territorio. A súa situación xeográfica ofrece, ademais, unha hora máis de luz natural durante os meses de verán, unha vantaxe clave para a planificación e o aproveitamento das xornadas de rodaxe.
Aquí, o territorio convértese en linguaxe audiovisual. A relación entre natureza, patrimonio, arquitectura e actividade humana xera escenarios con carácter propio, capaces de soster historias diversas sen perder autenticidade. Unha terra onde tradición e contemporaneidade dialogan de maneira natural.
Galicia ofrece un contexto creativo sólido, cunha cultura audiovisual consolidada e unha clara vocación de acollida á produción. Un lugar pensado para contar historias con fondo, atmosfera e identidade.
COSTA
O mar comeza en Galicia. Rodeada por aproximadamente 1.300 quilómetros de océano Atlántico, a súa costa mestura algúns dos cantís máis altos de Europa con praias virxes de area branca. Faros, vilas mariñeiras, portos pesqueiros e industriais, rochas, buques, tronadas, illas, ondas, veleiros e acuarios conforman unha paisaxe atlántica única.
Rías profundas, estuarios naturais e horizontes abertos ao océano definen un territorio marcado pola forza do mar e pola luz cambiante. Mesmo os ríos atopan aquí o seu final, precipitándose directamente no océano nun fenómeno excepcional en Europa.
Unha costa viva, salvaxe e diversa, capaz de acoller relatos íntimos ou grandes producións de aventura.
PAISAXES DE INTERIOR
Galicia é verde e azul, amarela e castaño, laranxa, branco e violeta. A súa paisaxe está chea de cores, formas e texturas. Chairas verdes, suaves montes, pero tamén picos escarpados; ríos e regatos que debuxan canóns, remansos e fervenzas… moitos mundos nun só territorio.
O Camiño de Santiago, os bosques atlánticos, as reservas naturais, as pradeiras, a neve, as camelias, a horta, as castañas, os montes e os viñedos conforman unha xeografía diversa e viva. Galicia é tamén o país dos mil ríos: encoros, fervenzas, pontes e muíños que forman parte da súa identidade paisaxística e cultural.
ARQUITECTURA
Canteira infinita, Galicia empregou as materias primas extraídas das súas entrañas para erguer milleiros de construcións singulares, testemuñas de tempos pasados, cronistas do presente e visionarias do futuro. Castros, murallas romanas, pazos, catedrais e mosteiros, castelos, cruceiros, núcleos rurais, hórreos e pombais, balnearios, pontes milenarias e de vangarda.
Un patrimonio arquitectónico diverso no que conviven tradición e modernidade, integrado de forma natural na paisaxe e na identidade cultural do territorio. Espazos que permiten viaxar no tempo ou proxectarse cara ao futuro sen abandonar un mesmo escenario.
VILAS E CIDADES
Como as nosas xentes, as cidades galegas están cheas de vida. Santiago de Compostela naceu da forza dun mito, e esa enerxía permanece en cada unha das rúas empedradas que arrodean a impoñente Catedral. A Coruña, baixo a luz do faro romano máis antigo do mundo, é unha cidade moderna e vital aberta ao Atlántico. Ferrol é unha referencia histórica e actual da industria naval e sede da Armada española. Lugo e Ourense, atravesadas por un río Miño de augas tranquilas, permiten viaxar aos tempos do Imperio romano. Pontevedra, medieval e nobre, encarna o espírito xenuíno das capitais de provincia burguesas. Vigo simboliza a forza industrial, cun gran porto mercante e un potente sector pesqueiro.
Rúas, noite, tráfico, negocios, graffiti, parques e xardíns, escolas, arte, comercio, neón, concertos, hospitais, estacións, aeroportos… cidades vivas, dinámicas e cheas de posibilidades narrativas.
